राष्ट्रिय स्वतन्त्र पार्टी (रास्वपा) र उज्यालो नेपाल पार्टीबीच चलिरहेको एकता प्रयास अन्तिम समयमा आएर असफल भएको छ। पार्टी दर्ता गर्ने अन्तिम दिनसम्म पनि समझदारी मिलाउन नेताहरू सक्रिय रहे पनि मेलमिलाप हुन सकेन।
रास्वपाका एक उच्च स्रोतका अनुसार एकता प्रक्रिया टुटे पनि आगामी निर्वाचनका लागि चुनावी तालमेल भने सम्भव देखिएको छ। कुलमान घिसिङले कार्यवाहक सभापति पाउनुपर्ने अडान नछोडेपछि एकता रोकिन बाध्य भएको स्रोतको दाबी छ।
स्रोतले भन्यो, “कुलमानजीलाई उपसभापति दिने तयारी सुरुदेखि नै थियो। तर उहाँहरूको पक्षबाट ‘केही समयका लागि भए पनि कार्यवाहक सभापति नै चाहिन्छ’ भन्ने माग आयो। सो मागसहित एकता गर्दा पार्टी नै बुझाउनुपर्ने स्थिति बन्छ, जसलाई हामी स्वीकार गर्न सकेनौँ।”
यता, उज्यालो नेपालका एक नेताले भने कुलमान घिसिङ रवि लामिछानेलाई सभापति मानेर आफू सहसंयोजक बन्नेसम्म लचिलो थिए।
उनका शब्दमा, “कुलमानजी निकै लचक हुनुहुन्थ्यो। रविजी सभापति र कुलमानजी भावी प्रधानमन्त्री बन्ने मोडेलमा एकता गर्न रास्वपाका धेरै नेताहरू पनि सहमत थिए। तर, सहमति नजिक जाँदै गर्दा रास्वपाभित्रैबाट कुरा बिगारियो।”
उनले आरोप लगाउँदै भने, “रास्वपाका कार्यवाहक सभापति डीपी अर्यालले एकता हुन नदेका हुन्। एकता भए कुलमान हाबी हुने र आफू ओझेलमा पर्ने डरले उहाँले बारम्बार नयाँ सर्त राखेर प्रक्रिया रोक्नुभयो।”
वार्ताका क्रममा घण्टी चुनावचिन्ह लिएर चुनावमा जाने प्रस्तावमा पनि कुलमान तयार रहेको र पार्टी नाममा ‘उज्यालो’ कतै समावेश हुनुपर्ने अडान उनको रहेको बताइयो।
एकता वार्ताको जिम्मेवारी पाएका रास्वपाका उपसभापति डा. स्वर्णिम वाग्लेले सुरुदेखि नै कुलमानलाई उपसभापतिमा स्वागत गर्ने प्रस्ताव अघि बढाएका थिए। तर, रास्वपाका एक पदाधिकारीका अनुसार, कुलमानले चुनावसम्मका लागि भए पनि पार्टीको कमान्ड मागेपछि सहमति भङ्ग भयो।
उक्त पदाधिकारीले भने, “कार्यवाहक सभापतिको अधिकार चुनावसम्म कुलमानले पाउनुपर्छ भन्ने उनीहरूको अन्तिम अडान थियो। यसमा सहमति जुटेन। तर, चुनावमा सहकार्य भने गर्न हामी सकारात्मक छौँ। सम्भवतः चुनावी तालमेल हुनेछ।”
